Mu gihe ibiganiro byo gushaka amahoro ku rwego mpuzamahanga bikomeje hagati y’ihuriro rya AFC n’ubutegetsi bwa Kinshasa buyobowe na Félix Tshisekedi, umutekano mu bice bya Mulenge, Minembwe, ukomeje kujya habi.
Hari amakuru agaragaza ko abaturage bakomeje kugabwaho ibitero byifashisha drones, bivugwa ko bikorwa n’ingabo za FARDC zifatanyije n’indi mitwe n’ingabo z’u Burundi.
Abaturage bo muri utu duce bavuga ko mu ijoro ryo ku wa Mbere rishyira ku wa Kabiri, ibisasu byaguye mu midugudu irimo Lundu, Kalingi n’ahandi hafi aho. Bavuga ko ibyo bitero byatangiye nimugoroba bikageza mu rukerera, bigatera ubwoba n’ihungabana rikomeye mu baturage.
Amakuru ava mu bahatuye agaragaza ko hari amazu yasenywe n’amatungo menshi arimo inka yapfuye. Ibi byagize ingaruka zikomeye ku mibereho y’abaturage benshi batunzwe n’ubworozi, kuko ari bwo shingiro ry’ubukungu bwabo bwa buri munsi.
Nubwo hari amakuru avuga ko hari ababa baguye muri ibyo bitero, ntiharaboneka imibare yemejwe n’inzego zibifitiye ububasha.
Ibi bikorwa bibaye mu gihe hari icyizere cyari cyongeye kugaragara mu biganiro by’amahoro biri kubera mu Busuwisi, bigamije gushakira umuti ikibazo cy’umutekano muke umaze igihe mu Burasirazuba bwa Repubulika Iharanira Demokarasi ya Congo.
Abasesenguzi bagaragaza ko gukomeza kw’imirwano bishobora kudindiza imbaraga zashyizwe muri ibi biganiro.
Amateka ya Minembwe agaragaza ko aka gace kamaze igihe mu makimbirane ashingiye ku bibazo by’ubutaka, amoko n’ubutegetsi. Abanyamulenge bavuga ko bakomeje kwibasirwa, mu gihe hari n’abandi babona ko ikibazo gifite imizi igoye isaba kurebwa mu buryo bwagutse.
Nubwo hari imitwe irimo uwa Twirwaneho uvugwa ko urinda abaturage, abasesenguzi bemeza ko igisubizo kirambye kitazava ku mbaraga za gisirikare gusa. Bashimangira ko hakenewe ibiganiro byimbitse, ubwiyunge n’ubushake bwa politiki, hagashyirwa imbere ubuzima n’uburenganzira bw’abasivili kugira ngo amahoro arambye aboneke.