Mu gitondo cyo kuri uyu wa mbere Taliki 16 Werurwe 2026, Minisitiri w’Uburezi, Joseph Nsengimana, yatangije ku mugaragaro umushinga wa EU Twinning ugamije gushimangira uburezi bw’abana bato (Early Childhood Education) mu Rwanda.
Uyu mushinga ni ku bufatanye hagati y’u Rwanda, Umuryango w’Ubumwe bw’u Burayi (EU), ndetse na guverinoma za Lithuania na Finland.
Uyu mushinga mushya uje gushyigikira gahunda u Rwanda rusanzwe rufite yo kwagura amahirwe yo kugera ku burezi bufite ireme ku bana bari mu mashuri y’incuke. By’umwihariko,uyu mushinga uzibanda ku kongera ubuziranenge mu myigire, guteza imbere amahugurwa y’abarimu, no guteza imbere uburyo bwo kwigisha bushingiye ku gukina (play-based learning), bufasha abana kwiga bishimye kandi bafite ubushake.
Byongeye kandi, uyu mushinga uzafasha mu kunoza uburyo bwo kugenzura ireme ry’uburezi (quality assurance systems), ndetse unashimangire uruhare rw’ababyeyi n’imiryango mu burezi bw’abana bato, hagamijwe kubaka urufatiro rukomeye rw’imikurire yabo.
Mu ijambo yagejeje ku bitabiriye iki gikorwa, Minisitiri yashimangiye akamaro ko gushora imari mu burezi bw’abana bato, agaragaza ko ari bwo shingiro ry’iterambere rirambye ry’igihugu.
Yagize ati: “Ejo hazaza h’igihugu gategurwa umwana ataragera mu mashuri abanza. Amatsiko aterwa inkunga, icyizere yubakirwa, n’urukundo rwo kwiga arutozwa mu myaka ya mbere, ni byo biba umusingi w’uburezi bwose buzakurikiraho. Gushimangira uburezi bw’abana bato uyu munsi, ni ishoramari ku bahanga, abacuruzi, abarimu n’abayobozi b’ejo hazaza b’u Rwanda.”
Uyu mushinga ugaragaza intambwe ikomeye u Rwanda rukomeje gutera mu guteza imbere uburezi bufite ireme uhereye ku mashuri y'incuke, hagamijwe kubaka ejo hazaza heza h’abana n’igihugu muri rusange.
