United States yatangaje ko yohereje abasirikare bayo ba Marines 2,200 hamwe n’amato atatu y’intambara ashobora kugendera ku nyanja no gutwara ingabo ava mu birindiro byayo byo mu Japan berekeza mu karere k’Middle East, mu gihe amakimbirane n’Iran akomeje gukaza umurego.
Nk’uko byatangajwe na ABC News, iki cyemezo cyafashwe mu rwego rwo kongera imbaraga za gisirikare z’Amerika muri aka karere no kwitegura ibishobora kuvuka mu ntambara ikomeje hagati ya United States, Israel na Iran.
Aba basirikare boherejwe ni abagize umutwe wa Marine Expeditionary Unit, usanzwe ufite ubushobozi bwo gutabara byihuse, kurinda inyungu z’Amerika ndetse no gufasha mu bikorwa byihutirwa bya gisirikare cyangwa ubutabazi.
Amato atatu yoherejwe ni ayo mu bwoko bwa amphibious ships, ashobora gutwara ingabo nyinshi, indege za kajugujugu n’ibikoresho bya gisirikare, bikayafasha gutangiza ibikorwa by’intambara ku nyanja no ku butaka.
Abasesenguzi mu bya politiki n’umutekano bavuga ko kohereza izo ngabo bishobora kuba ikimenyetso cy’uko Amerika iri kwitegura guhangana n’ikorwa iryo ari ryo ryose rishobora guturuka ku ntambara iri gukaza umurego mu karere ka Middle East.
Ni mu gihe amakuru atandukanye akomeje kugaragaza ko ibitero n’ubushyamirane hagati ya Iran n’inshuti za Amerika muri aka karere bikomeje kwiyongera, ibintu bishobora gutuma umutekano w’akarere urushaho guhungabana.